सुवर्ण गाउँपालिकाद्वारा आगामी आर्थिक वर्ष २०८३/०८४ का लागि ४३ करोड २६ लाख बढीको बजेट प्रस्तुत, सुवर्ण शमशेरको योगदानको स्मरण

बारा  १० असार ।
बारा जिल्लाको सुवर्ण गाउँपालिकाले आगामी आर्थिक वर्ष २०८३/०८४ को लागि आफ्नो नीति, कार्यक्रम तथा बजेट सार्वजनिक गरेको छ। बुधबार (असार १० गते) गाउँ कार्यपालिकाको कार्यालय, कवही गोठमा भव्यताका साथ आयोजित गाउँ सभाको १७औं अधिवेशनमा गाउँपालिकाले ४३ करोड २६ लाख ७९ हजार रुपैयाँ बराबरको अनुमानित बजेट प्रस्तुत गरेको हो।
​कार्यक्रमको औपचारिक सुरुवात गर्दै गाउँपालिकाका प्रमुख प्रशासकीय अधिकृत अमोद चौधरीले निकै ओजपूर्ण, सान्दर्भिक र ऊर्जाशील स्वागत मन्तव्य राख्नुभएको थियो। आफ्नो मन्तव्यका क्रममा उहाँले गाउँपालिकाको समग्र विकासका लागि कर्मचारी तन्त्र र जनप्रतिनिधिबीचको नङ र मासुको जस्तो सम्बन्ध हुनुपर्नेमा जोड दिनुभयो। सुशासन, पारदर्शिता र छिटोछरितो सेवा प्रवाहलाई चुस्त दुरुस्त बनाउने प्रशासनिक प्रतिबद्धता व्यक्त गर्दै उहाँले उपस्थित सम्पूर्ण अतिथि, सभासद तथा सरोकारवालाहरूलाई शब्द सुमनले स्वागत गर्नुभयो। उहाँको सटिक र प्रभावकारी मन्तव्यले सभाको गरिमा बढाउनुका साथै कार्यक्रमको उत्कृष्ट जग बसालेको थियो।

​त्यसलगत्तै, सुवर्ण गाउँपालिकाका अध्यक्ष राजेश प्रसाद यादवले सभामा आगामी आर्थिक वर्ष २०८३/०८४ को नीति, कार्यक्रम तथा बजेट प्रस्तुत गर्नुभयो। अध्यक्ष यादवले गाउँपालिकाको सन्तुलित र दिगो विकासलाई केन्द्रमा राख्दै शिक्षा, स्वास्थ्य, कृषि, भौतिक पूर्वाधार र रोजगारी सिर्जनालाई उच्च प्राथमिकतामा राखेर नीति तथा कार्यक्रम तय गरिएको प्रष्ट पार्नुभयो।
​सभालाई सम्बोधन गर्दै अध्यक्ष यादवले भन्नुभयो, “हामी सुवर्ण गाउँपालिकालाई जिल्लाकै नमुना, समृद्ध र आत्मनिर्भर गाउँपालिका बनाउने महाअभियानमा छौँ। कृषिको आधुनिकीकरण, हरेक वडामा सर्वसुलभ स्वास्थ्य सेवा र गुणस्तरीय प्राविधिक शिक्षा हाम्रो मुख्य लक्ष्य हो। विगतका वर्षहरूमा अधुरा रहेका बहुवर्षीय योजनाहरूलाई सम्पन्न गर्ने र सीमान्तकृत तथा लक्षित वर्गको प्रत्यक्ष जीवनस्तर उकास्ने गरी हामीले यो बजेट विनियोजन गरेका छौँ।”

​सुवर्ण शमशेरको ऐतिहासिक योगदानको चर्चा
​सभामा शुभकामना मन्तव्य राख्दै गाउँपालिका उपाध्यक्षका श्रीमान् तथा युवा नेता सत्येन्द्र कुमार यादवले सुवर्ण गाउँपालिकाको ऐतिहासिक पृष्ठभूमि र यसको नामकरणको औचित्यमाथि प्रकाश पार्नुभयो। मञ्चबाट बोल्दै नेता यादवले नेपालको लोकतान्त्रिक आन्दोलनका अग्रणी व्यक्तित्व तथा विकासका संवाहक सुवर्ण शमशेर राणाको नामबाट यस पालिकाको नाम ‘सुवर्ण गाउँपालिका’ राखिएको स्मरण गराउँदै उहाँको उच्च प्रशंसा गर्नुभयो।

​”सुवर्ण शमशेर राणाको दूरगामी सोच, त्याग र राष्ट्रप्रतिको महत्त्वपूर्ण योगदानलाई हामीले कहिल्यै भुल्नु हुँदैन। उहाँकै नामबाट स्थापित यस गाउँपालिकाले उहाँको गौरवशाली इतिहासलाई बोकेको छ,” युवा नेता यादवले प्रभावशाली शैलीमा भन्नुभयो, “अब हाम्रो काँधमा सुवर्ण शमशेरको नामलाई थप उचाइमा पुर्‍याउने ऐतिहासिक जिम्मेवारी आएको छ। यस पालिकाभित्रका सम्पूर्ण नागरिकको उन्नति, प्रगति र समृद्धिका लागि हामी सबै पक्ष एकजुट भएर अगाडि बढ्नुको विकल्प छैन।” उहाँको यो ऊर्जाशील मन्तव्यले उपस्थित सम्पूर्णमा गाउँपालिकाको विकासप्रतिको साझा दायित्वबोध गराएको थियो।
​यस्तो छ बजेटको स्रोत र आकार:
​गाउँ सभामा प्रस्तुत ‘कुल अनुमानित आयको विवरण’ (अनुसूची-२) अनुसार आगामी आर्थिक वर्षको कुल बजेट ४३ करोड २६ लाख ७९ हजार (रु. ४३,२६,७९,०००/-) रहेको छ। बजेटका स्रोतहरूलाई निम्न अनुसार बाँडफाँड गरिएको छ:
​१. संघीय सरकारबाट प्राप्त अनुदान: ​समानिकरण अनुदान: रु. १० करोड ३ लाख (१०,०३,००,०००)
​सशर्त अनुदान: रु. १९ करोड ४४ लाख (१९,४४,००,०००) ​राजस्व बाँडफाँड: रु. ९ करोड ६० लाख ८६ हजार (९,६०,८६,०००) ​२. प्रदेश सरकारबाट प्राप्त अनुदान: ​समानिकरण अनुदान: रु. ६८ लाख ४० हजार (६,८४,०,०००)
​समपुरक अनुदान: शून्य (०) ​विशेष अनुदान: रु. २० लाख (२०,००,०००) ​राजस्व बाँडफाँड: रु. ४५ लाख ५३ हजार (४५,५३,०००) ​सशर्त अनुदान: रु. ४० लाख (४०,००,०००) ​३. आन्तरिक तथा अन्य स्रोत: ​आन्तरिक आय (अनुमानित): रु. १ करोड (१,००,००,०००) ​अल्या (आन्तरिक): रु. १ करोड (१,००,००,०००) ​मालपोत कार्यालय (घर जग्गा रजिष्ट्रेशन शुल्क बाँडफाँड): रु. ४० लाख (४०,००,०००) ​PLGSP (प्रदेश तथा स्थानीय सहयोग कार्यक्रमबाट प्राप्त हुने अनुमानित): रु. ५ लाख (५,००,०००)
​यस यथार्थपरक र वृहत बजेट तथा नीति कार्यक्रमले सुवर्ण गाउँपालिकाको चौतर्फी विकासमा कोसेढुंगा साबित हुने अपेक्षा गरिएको छ। गाउँ सभामा जनप्रतिनिधि, स्थानीय अगुवा, सञ्चारकर्मी, राजनीतिक दलका प्रतिनिधि र राष्ट्रसेवक कर्मचारीहरूको उत्साहजनक सहभागिता रहेको थियो।