काठमाडौँ । देशभरका चिकित्सकहरूले आ–आफ्नो कार्यस्थलमा आइतबार एक घण्टा धर्ना दिएका छन् । नेपाल चिकित्सक संघको आह्वानमा भएको विरोध कार्यक्रम अन्तर्गत आइतबार कार्यालय सुरु भएसँगै चिकित्सकहरूले एक घण्टा धर्ना दिएको हुन् ।
नेपाल चिकित्सक संघका पूर्व अध्यक्ष डा. लोचन कार्कीले संघका सम्पूर्ण शाखा कार्यालयले चिकित्सकहरूलाई प्रमाणपत्र संकलन गरी नेपाल मेडिकल काउन्सिललाई पठाउने तयारी भइरहेको उनले बताए ।
चिकित्सक तथा स्वास्थ्यकर्मीले उपचारमा लापरबाही गरेको भन्दै उपभोक्ता अदालतले धमाधम चिकित्सक र स्वास्थ्य संस्थामाथि क्षतिपूर्ति भराउन आदेश जारी गरेपछि चिकित्सक संघ आन्दोलनमा उत्रिएको हो ।
संघले उपभोक्ता संरक्षण ऐन २०७५ लाई आवश्यक संशोधनका लागि दबाब दिन संघका महासचिव डा. सञ्जीव तिवारीको संयोजकत्वमा टास्कफोर्स गठन गरेको थियो ।
यहीबीचमै महासचिव डा. तिवारीविरुद्ध उच्च अदालतमा अवहेलना मुद्दा दायर भएको छ । डा. तिवारी विरुद्ध १७ असारमा उच्च अदालत पाटनमा मुद्दा दायर भएको हो ।
न्यायाधीशद्वय श्यामकुमार भट्टराई र हेमन्त रावलले इजलासले उनलाई ७ दिनभित्र लिखित जवाफसहित अदालतमा उपस्थित हुन आदेश दिएको दिइसकेको छ । अदालतको उपस्थित हुने आदेश दिएसँगै नेपाल चिकित्सक संघले आक्रामक रूपमा आन्दोलनका कार्यक्रमहरू सार्वजनिक गरेको हो ।
यसैबिच चिकित्सकहरूले सोमबार देशभरका अस्पताल तथा स्वास्थ्य संस्था आकस्मिक बाहेकका सम्पूर्ण सेवा बन्द गर्ने भएका छन् ।