चिकित्सक संघको आन्दोलनप्रति गृहसचिवको गम्भीर चासो, स्वास्थ्य सचिवलाई शीघ्र समाधानका लागि निर्देशन

गृहसचिव गोकर्णमणि दुवाडीले स्वास्थ्य तथा जनसङ्ख्या मन्त्रालयका सचिव डा. विकास देवकोटालाई पत्र लेख्दै समस्याको शीघ्र समाधानका लागि उपयुक्त विधि अपनाउन भनेका छन् ।

चिकित्सक संघले उपभोक्ता अदालतले अस्पताल र चिकित्सकविरुद्ध गरेको फैसलाको विरोधमा काठमाडौँसहित विभिन्न जिल्लामा नेपाल मेडिकल काउन्सिलको प्रमाणपत्र काउन्सिलमै बुझाउनेसम्मका आन्दोलनका कार्यक्रम गरिरहेको छ। यस्ता विरोध, धर्ना, जुलुस र बन्दले आम नागरिकको स्वास्थ्यसम्बन्धी हक र उपभोक्ता अधिकार हनन भएको तथा दैनिक जनजीवन र सुरक्षा व्यवस्थापनमा नकारात्मक प्रभाव परेको गृह मन्त्रालयको ठहर छ।

गृहसचिव दुवाडीले स्वास्थ्य मन्त्रालयलाई सम्बन्धित पक्षसँग वार्ता वा अन्य उपयुक्त माध्यमबाट समस्या समाधान गर्न अनुरोध गरेका छन्। पत्रमा स्वास्थ्य क्षेत्रको संवेदनशीलतालाई ध्यानमा राख्दै आन्दोलनले जनजीवनमा पारेको असरप्रति गम्भीर हुन आग्रह गरिएको छ।

पत्रको अवगतार्थ गृहमन्त्री र मुख्यसचिवलाई समेत पठाइएको छ। चिकित्सक संघको आन्दोलनले स्वास्थ्य सेवा प्रभावित भएको अवस्थामा सरकारले कस्तो कदम चाल्छ भन्ने विषयलाई धेरैले चासोका साथ हेरिरहेका छन्।