नेपाल राष्ट्र बैंकले बैंकिङ प्रणालीबाट थप ५० अर्ब रुपैयाँ बराबरको तरलता सङ्कलन गर्ने भएको छ। आइतबारका लागि तय गरिएको यो विशेष सङ्कलन कार्यक्रमको सूचना राष्ट्र बैंकले सार्वजनिक गरेको हो।
राष्ट्र बैंकका अनुसार, आगामी ४२ दिनका लागि बोलकबोल प्रक्रियामार्फत तरलता संकलन गरिनेछ। संकलित तरलताको साँवा तथा ब्याज भुक्तानी भदौ २९ गते हुनेछ।
उक्त बोलकबोल प्रक्रियामा ‘क’, ‘ख’ र ‘ग’ वर्गका इजाजतप्राप्त बैंक तथा वित्तीय संस्थाहरूले मात्र सहभागिता जनाउन पाउनेछन्। सहभागी संस्थाले न्यूनतम १० करोड रुपैयाँको प्रस्ताव राख्न सक्ने व्यवस्था गरिएको छ। प्रस्तावित रकम ५ करोडको गुणानुपातमा तोकिएको दरमा भाग लगाइनेछ भने बाँकी रकम निःशेष भागसम्म स्वीकृत गरिनेछ।
राष्ट्र बैंकले देशको मौद्रिक तरलता सन्तुलनमा राख्न यस्ता अल्पकालीन सङ्कलन उपकरणहरू समय–समयमा सञ्चालन गर्दै आएको जनाएको छ। यसमार्फत बैंकिङ प्रणालीमा सन्तुलन कायम गर्नु राष्ट्र बैंकको प्रमुख उद्देश्य रहेको स्पष्ट गरिएको छ।
