कलैया, २६ पौष
नेपाल दलित संघर्ष समिति बारा द्वारा आयोजित जिल्ला स्तरीय भेला शनिबार कलैयामा सम्पन्न भएको छ । भेलाको अध्यक्षता नेपाल दलित संघर्ष समिति बारा का अध्यक्ष शिवदयाल पासवानले गर्नुभएको थियो ।
भेलामा अमिर नेटुईन, शर्मा बैठा, रामशरण पासवान, देवलाल पासवान, राजदेव पासवान, रघुनाथ दास, सुदन दास, भदै राम, महेश विश्वकर्मालगायत दलित समुदायका अगुवा, युवा नेता तथा सदस्यहरूको उल्लेखनीय उपस्थिति रहेको थियो ।
भेलालाई सम्बोधन गर्दै दलित युवा नेता तथा नेपाल दलित संघर्ष समिति बारा का सह–संयोजक तेजनारायण रामले देशमा भएका हरेक परिवर्तनकारी आन्दोलनमा दलित समुदायको ऐतिहासिक र प्रशंसनीय भूमिका रहेको बताउनुभयो । माओवादी विद्रोह, जनआन्दोलन तथा मधेश आन्दोलनमा दलित समुदाय अग्रपंक्तिमा रहेर संघर्ष गरे पनि आजसम्म मनुवादी तथा बाहुनवादी सोचका कारण दलित समुदाय विभिन्न प्रकारका अन्याय र पीडाबाट मुक्त हुन नसकेको उहाँको भनाइ थियो ।
Related Posts
उहाँले दलित समुदाय सामाजिक बहिष्कारको सिकार भइरहेको, चेलीबेटीमाथि बलात्कार जस्ता जघन्य घटनाहरू भइरहेकाले समुदाय थप पीडित बन्नुपरेको यथार्थ प्रस्तुत गर्नुभयो । साथै आफ्ना हक, अधिकार र न्यायका लागि आवाज उठाउँदा दलित युवाहरू कुटपिट, दमन र अपमानित जीवन जिउन बाध्य बनाइएको अवस्था रहेको पनि उल्लेख गर्नुभयो ।
सह–संयोजक रामले अब दलित समुदाय कुनै पनि किसिमको लोभ–लालचमा नपरी दारु–मासु जस्ता प्रलोभन अस्वीकार गर्दै आफ्नो हक, हित र अधिकारको संरक्षण गर्ने नेता र राजनीतिक शक्तिलाई एकजुट भएर समर्थन गर्नुपर्नेमा जोड दिनुभयो ।
भेलाले आगामी कार्यक्रमहरू समेत तय गरेको छ । निर्णयअनुसार नेपाल दलित संघर्ष समिति बारा को आयोजनामा कलैया उपमहानगरपालिकास्तरीय नगर भेला मिति २०८२ साल माघ १० गते शनिबार आयोजना गरिनेछ । त्यसैगरी पचरौता नगर समितिको नगर भेला मिति २०८२ साल माघ ३ गते शनिबार गर्ने निर्णय पनि भेलाले गरेको छ ।
भेलाले दलित समुदायको अधिकार, सम्मान र न्यायका लागि संगठित संघर्षलाई अझ सशक्त बनाउँदै अघि बढ्ने प्रतिबद्धतासहित कार्यक्रम समापन गरिएको थियो ।
