काठमाडौं, माघ ८ : निर्वाचन आयोगले आज प्रतिनिधिसभा सदस्य पदका उम्मेदवारहरूको नामावली सार्वजनिक गर्ने भएको छ। मंगलबार मनोनयन दर्ता गराएका उम्मेदवारहरूको नामावली आज बेलुकी ५ बजेदेखि ७ बजेसम्म प्रकाशन गरिने आयोगले जनाएको छ।
मंगलबार साँझसम्म मनोनयन दर्ता सम्पन्न भएपछि आयोगले बुधबार बिहान १० बजेदेखि दिउँसो ३ बजेसम्म उम्मेदवारको योग्यतासम्बन्धी उजुरी संकलन गरेको थियो। दर्ता भएका उजुरीहरूमाथि बुधबार साँझ नै जाँचबुझ सम्पन्न भइसकेकाले आज नामावली प्रकाशन गर्न लागिएको आयोगले जानकारी दिएको छ।
आयोगको कार्यतालिका अनुसार माघ ९ गते शुक्रबार बिहान १० बजेदेखि दिउँसो १ बजेसम्म उम्मेदवारहरूले नाम फिर्ता लिन सक्नेछन्। सोही दिन दिउँसो १ बजेदेखि ३ बजेसम्म उम्मेदवारको अन्तिम नामावली प्रकाशन गरिनेछ। त्यसपछि दिउँसो ४ बजेदेखि साँझ ७ बजेसम्म उम्मेदवारलाई निर्वाचन चिह्न प्रदान गरिने कार्यक्रम तय गरिएको छ।
निर्वाचन आयोगका अनुसार यस निर्वाचनमा कुल ३ हजार ४८६ जनाको उम्मेदवारी दर्ता भएको छ। जसमध्ये ३ हजार ८९ जना पुरुष, ३९६ जना महिला र १ जना तेस्रो लिङ्गी उम्मेदवार रहेका छन्।
यस्तै, आगामी निर्वाचनमा सहभागी हुने मतदाताको संख्या १ करोड ८९ लाख ०३ हजार ६८९ रहेको छ। यसमा ९६ लाख ६३ हजार ३५८ पुरुष, ९२ लाख ४० हजार १३१ महिला तथा अन्य २०० मतदाता रहेका छन्।
