कलैयाको सडकमा उर्लियो सद्भावको जनसागर: ‘हिन्दू–मुस्लिम भाइभाइ’को नाराले दियो देशलाई एकताको सन्देश
कलैया, बारा । बारा सदरमुकाम कलैयाको सडकमा आजको दृश्य निकै फरक र ऊर्जाशील थियो। सडकमा न कुनै विरोध प्रदर्शन थियो, न त कुनै राजनीतिक आन्दोलन; तर हजारौंको जनसागर उर्लिएको थियो। यो भिड थियो— आपसी प्रेम, भाइचारा र साम्प्रदायिक एकताको।
जिल्ला प्रशासन कार्यालय बाराको विशेष अगुवाइमा निकालिएको ‘बृहत सद्भाव र्याली’ले सिंगो कलैया बजारलाई शान्ति र एकताको सुत्रमा बाँधेको छ। प्रशासन कार्यालयको प्राङ्गणबाट सुरु भएको हजारौंको प्रभातफेरीले कलैयाका मुख्य चोक, बजार र गल्लीहरूको परिक्रमा गर्दै पुनः सोही स्थानमा पुगेर समापन भएको थियो। र्यालीका क्रममा सहभागीहरूले एकै स्वरमा लगाएको “हिन्दू मुस्लिम भाइभाइ” को नाराले सिंगो सहर गुञ्जायमान बनेको थियो, जसले धार्मिक सहिष्णुताको निकै बलियो र सुन्दर सन्देश प्रवाह गरेको छ।
सर्वपक्षीय र ऐतिहासिक सहभागिता
यस सद्भाव र्यालीको सबैभन्दा सशक्त पक्ष यसमा देखिएको अभूतपूर्व र सर्वपक्षीय ऐक्यबद्धता थियो। कुनै एउटा वर्ग, तह वा समुदायमा मात्र सीमित नरही, समाजका सबै जातजाति र धर्मावलम्बीहरू एउटै लाइनमा काँधमा काँध मिलाएर हिँडेका थिए।
कार्यक्रमको गरिमा त्यतिबेला अझ बढ्यो, जतिबेला बारा जिल्लाका चारवटै निर्वाचन क्षेत्रका निर्वाचित सांसदहरू र १६ वटै स्थानीय तहका पालिका प्रमुखहरू (मेयर/अध्यक्ष) एकसाथ सडकमा देखिए। उनीहरूसँगै स्थानीय समाजसेवी, नागरिक समाजका अगुवा, विभिन्न संघसंस्थाका प्रतिनिधिहरू र हजारौं सर्वसाधारणको उपस्थिति रहेको थियो। नेतृत्व वर्ग र जनता एउटै उद्देश्यका साथ सडकमा उत्रिएको यो दृश्य आफैंमा ऐतिहासिक थियो।
विविधतामा एकताको अनुकरणीय पाठ
कुनै पनि प्रकारको असमझदारी वा साम्प्रदायिक तिक्ततालाई चिर्दै बारावासीले देखाएको यो सद्भाव साँच्चै नै अनुकरणीय छ। जनप्रतिनिधिदेखि आम नागरिकसम्मले हातेमालो गर्दै दिएको यो शान्तिको सन्देशले कलैयालाई मात्र नभई समग्र देशलाई नै ‘विविधताबीचको एकता’को महत्त्वपूर्ण पाठ सिकाएको छ। जिल्ला प्रशासन कार्यालयको यो कदमलाई स्थानीयबासीले निकै सह्राहनीय कार्यको रूपमा लिएका छन्।
