पर्सा: ठोरी गाउँपालिकाले आगामी आर्थिक वर्ष २०८२/८३ का लागि ५१ करोड रुपैयाँभन्दा बढीको बजेट ल्याएको छ । ठोरी–४ घेयाङ डाँडास्थित गाउँपालिका कार्यालयको सभाकक्षमा बुधबार आयोजित ठोरी गाउँपालिकाको गाउँसभाको १३औं अधिवेशनमा उपाध्यक्ष गोकुलीकुमारी रेग्मीले आगामी आर्थिक वर्षका लागि ५१ करोड ५४ लाख ६४ हजार रुपैयाँ बराबरको अनुमानित वार्षिक बजेट प्रस्तुत गरेकी हुन् ।जसमा आन्तरिक राजस्व ३० लाख रुपैयाँ, संघ सरकारका तर्फबाट प्राप्त हुने अनुदान ३२ करोड ४१ लाख, प्रदेश सरकारबाट प्राप्त हुने अनुदान १ करोड ९५ लाख, संघ सरकारबाट राजस्व बाँडफाँडतर्फ प्राप्त हुने ६ करोड ९७ लाख ७२ हजार, प्रदेश सरकारबाट राजस्व बाँडफाँडबाट प्राप्त हुने ७७ लाख रुपैयाँ रहेको छ । यस्तै, संघ सरकारबाट सामाजिक सुरक्षा भत्ताबापत प्राप्त हुने रकम ९ करोड ५० लाख रुपैयाँ रहेको प्रमुख प्रशासकीय अधिकृत धर्मराज थापाले जानकारी गराए ।
